Kastoy ti Dalanam...

Kaligtasan

kastoy — Sun, 12 Dec 2010 11:25:56 +0000

Kung Dios ang tatanungin kung sino ang dapat maligtas, ang ibig niya ay lahat ng tao ay dapat maligtas.

Rom 10:9 Sapagka’t kung ipahahayag mo ng iyong bibig si Jesus na Panginoon, at sasampalataya ka sa iyong puso na binuhay siyang maguli ng Dios sa mga patay ay maliligtas ka:

Nguni’t ang prophesiya na rin ang naghayag na hindi lahat ng tao ay maliligtas, katunayan ang talatang ito ay nagsasaad na si Kristo ay magdadala lamang ng maraming anak at hindi ang lahat.

Heb 2:10 Sapagka’t marapat sa kaniya na pinagukulan ng lahat ng mga bagay, at sa pamamagitan niya ang lahat ng mga bagay, sa pagdadala ng maraming anak sa kaluwalhatian na gawing sakdal siyang may gawa ng kaligtasan nila sa pamamagitan ng mga sakit.

Gayon din sa hanay ng mga Anghel na sinasabing 2/3 lang ang maliligtas at ang natitirang ikatlong bahagi ay sa ikakapahamak.

Rev 12:4 At kinaladkad ng kaniyang buntot ang ikatlong bahagi ng mga bituin sa langit, at ipinaghagis sa lupa: at lumagay ang dragon sa harapan ng babaing manganganak na, upang lamunin ang kaniyang anak pagkapanganak niya.

Ang mga bituin na tinutukoy sa itaas ay mga anghel na pinatutunayan naman ng talatang sumusunod.

Rev 1:20 Ang hiwaga ng pitong bituin na iyong nakita sa aking kanang kamay, at ng pitong kandelerong ginto. Ang pitong bituin ay ang mga anghel ng pitong iglesia: at ang pitong kandelero ay ang pitong iglesia.

Dalangin ko sa Dios, makasama nawa ako sa sinasabing maraming anak ng kaluwalhatian na magiging mga sakdal. Sana kapatid, makasama ka rin.

Sa Dios

kastoy — Fri, 08 Oct 2010 03:48:08 +0000

Sabi ng isang kakilala ko, mag-aral kang maging Pastor ng isang relihion at tiyak yayaman ka. Di ko siya masisi sa kanyang paniniwalang ito, dangan naman kasi, karamihan sa mga mangangaral ng relihion ay nagsisipagyaman. Di na siguro kailangang isa isahin ko pa, pansinin mo ang kanilang naglalakihang mga kapilya o simbahan at tiyak aayon ka sa aking sinasabi.

1 Tim 6:5 Pagtataltalan ng mga taong masasama ang pagiisip at salat sa katotohanan, na nagsisipagakala na ang kabanalan ay paraan ng pakinabang.

Pero, sa punto bista ni Kristo, ginhawa ba ang pagiging isang maka-dios o kabahagi ka sa mga pag-uusig?

Jn 15:20 Alalahanin ninyo ang salitang sa inyo’y aking sinabi, Ang alipin ay hindi dakila kay sa kaniyang panginoon. Kung ako’y kanilang pinagusig, kayo man ay kanilang paguusigin din; kung tinupad nila ang aking salita, ang inyo man ay tutuparin din.

Tanungin mo ang karamihan sa mga nagre-religion. Sa Dios ba kayo? Tiyak na tiyak ko na sasabihin nila, na sila ay maka-dios. Pero pansinin mo ang kanilang mga miyembro.

1 Cor 11:14 Hindi baga ang katalagahan din ang nagtuturo sa inyo, na kung may mahabang buhok ang lalake, ay mahalay sa kaniya?

1 Cor 11:15 Datapuwa’t kung ang babae ang may mahabang buhok, ay isang kapurihan niya; sapagka’t ang buhok sa kaniya’y ibinigay na pangtakip.

Mahaba ang buhok ng mga lalake at maiikli ang buhok ng mga babae. Kung kayo nga ito, tanungin ninyo ang inyong sarili, kabilang kaya kayo sa sinasabing mga anak ng Dios? Hindi kasi ito issue sa mga kaanib ng Iglesia ng Dios sapagkat ito’y kanilang sinusunod at sinasampalatayanan.

1 Cor 11:16 Datapuwa’t kung tila mapagtunggali ang sinoman, walang gayong ugali kami, ni ang iglesia man ng Dios.

At natitiyak ko na marami sa mga hindi kaanib ang magsisipagtunggali sa salitang ito, maging ang mga nagpapakunwaring mga banal kay Kristo.

Jas 2:10 Sapagka’t ang sinomang gumaganap ng buong kautusan, at gayon ma’y natitisod sa isa, ay nagiging makasalanan sa lahat.

Jas 3:2 Sapagka’t sa maraming mga bagay tayong lahat ay nangatitisod. Kung ang sinoman ay hindi natitisod sa salita, ay isang taong sakdal ang gayon, may kaya rin namang makapigil ng buong katawan.

Buhok pa lang ang ating pinag-uusapan, at sigurado marami na ang tututol, papaano na kaya kung bumaling naman tayo sa mga bisyo ng tao katulad ng simpleng paninigarilyo?

Jn 8:47 Ang sa Dios ay nakikinig ng mga salita ng Dios: dahil dito’y hindi ninyo dinirinig, sapagka’t kayo’y hindi sa Dios.

Kung hindi kayo sa Dios, kanino nga ba kayo?

Jn 8:44 Kayo’y sa inyong amang diablo, at ang mga nais ng inyong ama ang ibig ninyong gawin. Siya’y isang mamamatay-tao buhat pa nang una, at hindi nananatili sa katotohanan, sapagka’t walang katotohanan sa kaniya. Pagka nagsasalita siya ng kasinungalingan, ay nagsasalita siya ng sa ganang kaniya: sapagka’t siya’y isang sinungaling, at ama nito.

Kaarawan

kastoy — Tue, 05 Oct 2010 05:21:01 +0000

Eccles 12:1  Alalahanin mo rin naman ang Maylalang sa iyo sa mga kaarawan ng iyong kabataan, bago dumating ang mga masamang araw, at ang mga taon ay lumapit, pagka iyong sasabihin, Wala akong kaluguran sa mga yaon;

Eccles 12:2  Bago ang araw, at ang liwanag, at ang buwan, at ang mga bituin ay magdilim, at ang mga alapaap ay magsibalik pagkatapos ng ulan.

Eccles 12:3   Sa kaarawan na ang mga tagapagingat ng bahay ay manganginginig, ang mga tuhod may rayuma at arthritis na at ang mga malakas na lalake ay mapapayukod, kuba na at ang mga manggigiling ay mangaglilikat sapagka’t sila’y kaunti, ipin bungal na pati mani di na manguya dalawa lang kasi ang ipin di pa magkatapat at yaong nagsisidungaw sa mga dungawan ay mangasisilaw, malabo na ang mga mata

Eccles 12: 4 At ang mga pintuan ay sasarhan sa mga lansangan; takot nang palabasin ng mga anak baka kung saan mapunta kaya kinukulong pagka ang tunog ng giling ay hunina, ayan humina na ang pandinig, bingi na at ang isa’y babangon sa tinig ng ibon, ang agang gumising masakit na kasi ang likod at balakang sa pagtulog at lahat ng mga anak na babae ng tugtugin ay mabababa; di na makakanta ng mataas na tuno

Eccles 12:5 Oo, sila’y mangatatakot sa mataas, kailangan na ng power balance at ang mga kakilabutan ay mapapasa daan; takot ng masagasaan ng bisikleta at ang puno ng almendro ay mamumulaklak; buhok ay puti na o di kaya ay kalbo na at ang balang ay magiging pasan, mahina na pati magaan mabigat na sa kanya at ang pita ay manglulupaypay: wala ng sex life sapagka’t ang tao ay pumapanaw sa kaniyang malaong tahanan, at ang mga tagapanangis ay nagsisigala sa mga lansangan: Ayan ibuburol ka na, baka pati kabit mo at anak sa labas magsisipanangis

Habang bata ka pa, magbago ka na Teng bago ka man lang tangisan at ilibing!

Nilalang

kastoy — Fri, 10 Sep 2010 03:20:26 +0000

Mga marurunong man ay naililigaw din ng mga maling paniniwala na kanilang kinagisnan na ginawa rin naman ng kanilang mga magulang noong una pa man.

Rom 1:21 Sapagka’t kahit kilala nila ang Dios, siya’y hindi niluwalhati nilang tulad sa Dios, ni pinasalamatan; kundi bagkus niwalang kabuluhan sa kanilang mga pagmamatuwid at ang mangmang nilang puso ay pinapagdilim.

Rom 1:22 Ang mga nangagmamarunong ay naging mga mangmang,

Rom 1:23 At pinalitan nila ang kaluwalhatian ng Dios na hindi nasisira, ng isang katulad ng larawan ng tao na nasisira, at ng mga ibon, at ng mga hayop na may apat na paa, at ng mga nagsisigapang.

Rom 1:24 Dahil dito’y sa karumihan ng mga pita ng kanilang mga puso ay ibinigay sila ng Dios sa kahalayan, upang alisan nila ng puri ang kanilang mga katawan sa kanikanilang sarili:

Rom 1:25 Sapagka’t pinalitan nila ang katotohanan ng Dios ng kasinungalingan, at sila’y nagsisamba at nangaglingkod sa nilalang kay sa Lumalang, na siyang pinupuri magpakailan man. Siya nawa.

Pista ni Sta Maria, Sto Nino, San Labrador, San Miguel at ng kung sino-sinong mga santo at mga nilalang ang pinag-uukulan ng panahon ng mga tao.

1 Cor 10:20 Subali’t sinasabi ko, na ang mga bagay na inihahain ng mga Gentil, ay kanilang inihahain sa mga demonio, at hindi sa Dios: at di ko ibig na kayo’y mangagkaroon ng pakikipagkaisa sa mga demonio.

Maging matalino sana tayong tagasunod. Sumamba tayo at maglingkod lamang sa LUMALANG at hindi sa mga Nilalang lamang.

Gen 1:26 At sinabi ng Dios, Lalangin natin ang tao sa ating larawan, ayon sa ating wangis: at magkaroon sila ng kapangyarihan sa mga isda sa dagat, at sa mga ibon sa himpapawid, at sa mga hayop, at sa buong lupa, at sa bawa’t umuusad, na nagsisiusad sa ibabaw ng lupa.

Kanino ba sinabi ng Dios ang mga salitang “Lalangin natin ang mga tao sa ating larawan”.

Prov 8:22 Inari ako ng Panginoon sa pasimula ng kaniyang lakad, bago pinasimulan ang kaniyang mga gawa ng una.

Prov 8:23 Ako’y nalagay mula noong araw mula ng walang pasimula, bago nalikha ang lupa.

Prov 8:24 Ako’y nailabas ng wala pang mga kalaliman; nang wala pang mga bukal na sagana ng tubig.

Prov 8:25 Bago ang mga bundok ay nalagay, bago ang mga burol ay ako’y nailabas:

Prov 8:26 Samantalang hindi pa niya nililikha ang lupa, ni ang mga parang man, ni ang pasimula man ng alabok ng sanglibutan.

Prov 8:27 Nang kaniyang itatag ang langit nandoon ako: nang siya’y maglagay ng balantok sa balat ng kalaliman:

Prov 8:28 Nang kaniyang pagtibayin ang langit sa itaas: nang maging matibay ang mga bukal ng kalaliman:

Prov 8:29 Nang bigyan niya ang dagat ng kaniyang hangganan, upang huwag salangsangin ng tubig ang kaniyang utos: nang kaniyang iayos ang mga patibayan ng lupa:

Prov 8:30 Nasa siping nga niya ako na gaya ng matalinong manggagawa: at ako ang kaniyang ligaya sa araw-araw, na nagagalak na lagi sa harap niya;

Jn 8:58 Sinabi sa kanila ni Jesus, Katotohanan, katotohanang sinasabi ko sa inyo, Bago ipinanganak si Abraham, ay ako nga.

Pagkain

kastoy — Thu, 02 Sep 2010 02:01:37 +0000

Habang nasa harap ng masaganang pagkain, ay nag-umpisang mangaral ang ate sa nakababatang kapatid na nag-aaral. Mangyari’y nahuli kasi ito na naglalaro ng computer games.

Hindi ako pamilyar sa mga computer games pero sabi ng ate, nakita niya ang character nito in action sa oras na iyon na dapat sana ay nasa School ito at nag-aaral.

Mariing itinanggi naman niya ito at sinabing, “puede ba ate, patapusin mo muna akong kumain bago ka magsermon”, nawawalan kasi ako ng gana eh!.

Bigla kong naisip ang talatang ito.

Mt 4:4 Datapuwa’t siya’y sumagot, at sinabi, Nasusulat, Hindi sa tinapay lamang mabubuhay ang tao, kundi sa bawa’t salitang lumalabas sa bibig ng Dios.

Kung ang pagkain ay ikinabubuhay ng isang tao, hindi ba nararapat na bigkasin ang mabubuting aral at salita ng Dios habang ang isang tao ay kumakain ng tinapay na literal? Dalawa kasi ang pagkatao ng isang tao, ang pagkataong labas at ang pagkataong loob nito. Kaya pala ganito ang sabi ni Apostol Pablo sa mga taga Corinto.

2 Cor 4:16 Kaya nga hindi kami nanghihimagod; bagama’t ang aming pagkataong labas ay pahina, nguni’t ang aming pagkataong loob ay nababago sa araw-araw.

Kaya naman ang pagkain, maging literal o espiritual, ay may kakaibang reaksiyon sa tao maging sa masasama at sa mabubuti.

Jn 3:20 Sapagka’t ang bawa’t isa na gumagawa ng masama ay napopoot sa ilaw, at hindi lumalapit sa ilaw, upang huwag masaway ang kaniyang mga gawa.

Jn 3:21 Datapuwa’t ang gumagawa ng katotohanan ay lumalapit sa ilaw, upang mahayag na ang kaniyang mga gawa ay ginawa sa Dios.

Sa katunayan, ang pagkaing literal at espiritual ay may sariling papasukan at lalabasan. Ang pagkaing literal ay sa bibig pumapasok diretso sa tiyan lalabas sa puwet at ang pagkaing espiritual naman ay sa tainga pumapasok diretso sa puso lalabas sa bibig.

Mt 15:17 Hindi pa baga ninyo nalalaman, na ang anomang pumapasok sa bibig ay tumutuloy sa tiyan, at inilalabas sa daanan ng dumi?

Lk 6:45 Ang mabuting tao ay kumukuha ng kagalingan sa mabubuting kayamanan ng kaniyang puso; at ang masamang tao’y kumukuha ng kasamaan sa masamang kayamanan: sapagka’t sa kasaganaan ng puso ay nagsasalita ang kaniyang bibig.

Iglesia Ng Dios

kastoy — Sat, 21 Aug 2010 11:44:39 +0000

May binabanggit ang kasulatan na mga nangasa labas. Ito yung sinasabi ni Cristo na wala sa loob ng kanyang kulungan.

John 10:16 At mayroon akong ibang mga tupa, na hindi sa kulungang ito: sila’y kailangan din namang dalhin ko, at kanilang diringgin ang aking tinig/; at sila’y magiging isang kawan, at magkakaroon ng isang pastor.

Sino nga ba ang mga tupang ito na nangasa labas ng kulungan at sino naman ang mga nasa loob?

1 Cor 5:13 Datapuwa’t sa nangasa labas ay Dios ang humahatol. Alisin nga ninyo sa inyo ang masamang tao.

Generally speaking, karamihan kung gayon na mga nasa labas ay mga masasama. Ganito kasi ang sabi ni San Pablo sa mga Iglesia ng Dios na nasa Corinto.

1 Cor 6:9 O hindi baga ninyo nalalaman na ang mga liko ay hindi magsisipagmana ng kaharian ng Dios? Huwag kayong padaya: kahit ang mga mapakiapid, ni ang mga mananamba sa diosdiosan, ni ang mga mangangalunya, ni ang mga nangbababae, ni ang mga mapakiapid sa kapuwa lalake.

1 Cor 6:10 Ni ang mga magnanakaw, ni ang mga masasakim, ni ang mga manglalasing, ni ang mga mapagtungayaw, ni ang mga manglulupig, ay hindi mangagmamana ng kaharian ng Dios.

1 Cor 6:11 At ganyan ang mga ilan sa inyo: nguni’t nangahugasan na kayo, nguni’t binanal na kayo, nguni’t inaring-ganap na kayo sa pangalan ng Panginoong Jesucristo, at sa Espiritu ng ating Dios.

Ang sabi, ganyan ang mga ilan sa inyo ngunit’t nangahugasan na kayo. Naririto kung ganun sa loob ng Iglesia ng Dios ang mga tinatawag na mga banal bagama’t ang mga nangasa labas ay tinatawag na mga patay at mangabubuhay lamang kung titigilan ang pagkakabuyo sa mga kalayawan.

1 Tim 5:6 Datapuwa’t ang nangagpapakabuyo sa mga kalayawan, bagama’t buhay ay patay.

Kung saan kasi naroon ang bangkay ay doon din naman magkakatipon ang mga uwak. May kahawig yan na kasabihan sa wikang english na “Birds of the same feather flock together”.

Matt 24:28 Saan man naroon ang bangkay, ay doon mangagkakatipon ang mga uwak.

Kamatis

kastoy — Tue, 17 Aug 2010 16:10:19 +0000

May kasabihan sa Tagalog na ang isang bulok na kamatis kung hindi mo aalisin sa tiklis ay maihahawa ang mga walang sira. Ganun din naman sa tao.

1 Cor 15:33 Huwag kayong padaya: Ang masasamang kasama ay sumisira ng magagandang ugali.

Kaya nga, ipinaaalis sa pagsasama-sama ang mga kapatid sa pananampalataya na lumalaban sa mga aral ni Cristo.

1 Cor 5:13 Datapuwa’t sa nangasa labas ay Dios ang humahatol. Alisin nga ninyo sa inyo ang masamang tao.

Isang halimbawa ay ang mga katulad ni Himeneo at alejandro na itiniwalag dahil sa paglaban sa aral.

1 Tim 1:20 Na sa mga ito’y si Himeneo at si Alejandro; na sila’y aking ibinigay kay Satanas, upang sila’y maturuang huwag mamusong.

Ang ganitong klaseng tao ay binibigyan lamang ng isa o dalawang pagkakataon at sa ikatlo’y tuluyan nang itatakwil.

Titus 3:10 Ang taong may maling pananampalataya pagkatapos nang una at ikalawang pagsaway ay itakuwil mo;

Hindi ito yung kapatid na pinatatawad ng makapitongpu’t pito o apat na raan siyamnapung (490) beses. Sapagka’t ang mga kasalanang nagagawa dito ay yung hindi sinasadya o dala lang nang kahinaan ng laman.

Matt 18:21 Nang magkagayo’y lumapit si Pedro at sinabi sa kaniya, Panginoon, makailang magkakasala ang aking kapatid laban sa akin na siya’y aking patatawarin? hanggang sa makapito?

Matt 18:22 Sinabi sa kaniya ni Jesus, Hindi ko sinasabi sa iyo, Hanggang sa makapito; kundi, Hanggang sa makapitongpung pito.

Sapagka’t utos ang pag-aalis ng masasamang tao sa loob ng Iglesia ng Dios, marapat na tayo’y maging matibay sa ating pananampalataya, gaya ng pagkaturo, na sumasagana sa pagpapasalamat sa gabi’t araw.

Mark 14:38 Kayo’y mangagpuyat at magsipanalangin, upang huwag kayong magsipasok sa tukso: ang espiritu sa katotohanan ay may ibig, datapuwa’t mahina ang laman.

Magnanakaw

kastoy — Mon, 16 Aug 2010 12:56:11 +0000

Ganito ang sabi ng Panginoon;

Exod 20:15 Huwag kang magnanakaw.

Isang simpleng utos na nagpapahiwatig ng malaking pag-ibig ng Dios sa tao. Mahal din kasi ng Dios ang taong mananakawan at ito ang kanyang payo sa magnanakaw.

Eph 4:28 Ang nagnanakaw ay huwag nang magnakaw pa: bagkus magpagal, na igawa ang kaniyang mga kamay ng mabuting bagay, upang siya’y may maibigay sa nangangailangan.

Puputulin ba natin ang kanyang daliri’t mga kamay bilang parusa sa kanyang pagnanakaw? Ang mga nagsasagawa at nagpaparusa ng ganitong pamamaraan ay nagiging laban sa katuwiran at sagabal pa nga sa kalooban at layunin ng Dios sa tao. Pero bakit nga ba gustong gusto ng tao ang paggawa ng kasalanan?

Prov 9:17 Ang mga nakaw na tubig ay matamis, at ang tinapay na kinakain sa lihim ay masarap.

Gaya rin yan ng pangangalunya na masarap sa laman pero masarap nga ba? Hindi ba ang babae este ang tinapay na kinakain sa lihim ay katulad din ng kung kakainin nang hindi nagtatago? Kaya lang naman ito nagiging mas masarap ay dahil sa kapangyarihan ng kasalanan na bunga o dulot ng pagsalangsang.

Pansirang Damo

kastoy — Sun, 15 Aug 2010 13:02:39 +0000

Deut 21:21 At babatuhin siya ng mga bato, ng lahat ng mga lalake sa kaniyang bayan upang siya’y mamatay: gayon mo aalisin ang kasamaan sa gitna mo; at maririnig ng buong Israel, at matatakot.

Ito ang batas na iniutos ng Panginoon kay Moises subali’t ganito pa rin ba ang pamamaraan ng mga Kristiyano sa mga masasamang kapananampalataya na inihambing sa mga pansirang damo?

Mt 13:29 Datapuwa’t sinabi niya, Huwag; baka sa pagtitipon ninyo ng mga pangsirang damo, ay inyong mabunot pati ng trigo.

Mt 13:29 Pabayaan ninyong magsitubo kapuwa hanggang sa panahon ng pagaani: at sa panahon ng pagaani ay sasabihin ko sa mga mangaani, Tipunin muna ninyo ang mga pangsirang damo, at inyong pagbibigkisin upang sunugin; datapuwa’t tipunin ninyo ang trigo sa aking bangan.

May panahon pa ng pagsisisi Kapatid, habang hindi pa dumarating ang mangaani, bago mahuli ang lahat.

Silangan

kastoy — Sat, 14 Aug 2010 14:42:01 +0000

Ganito ang sabi ng Panginoon;

Is 43:5 Huwag kang matakot, sapagka’t ako’y sumasaiyo: aking dadalhin ang iyong lahi mula sa silanganan, at pipisanin kita mula sa kalunuran;

Is 46:11 Na tumatawag ng ibong mangdadagit mula sa silanganan, ng taong gumagawa ng aking payo mula sa malayong lupain; oo, aking sinalita, akin namang papangyayarihin; aking, pinanukala, akin namang gagawin.

Isa itong hula na kung pagninilay-nilayin at ating pag-aaralan ay tanging ang Pilipinas lamang ang pinaka-malapit sa tinutukoy na malayong lupain sa silangan. Nandirito kasi ang maraming bilang ng mga Kristiyanong nananampalataya kay Kristo kumpara sa mga karatig na bansang may mga iba’t-ibang paniniwala.

Hindi ito mga aral na itinuro ng mga dayuhan na nagmula sa kanluran at dinala sa silangan.

Malachi 1:11 Sapagka’t mula sa sinisikatan ng araw hanggang sa nilulubugan niyaon, magiging dakila ang aking pangalan sa mga Gentil; at sa bawa’t dako ay paghahandugan ng kamangyan ang aking pangalan, at ng dalisay na handog: sapagka’t ang aking pangalan ay magiging dakila sa gitna ng mga Gentil, sabi ng Panginoon ng mga hukbo.

Ang ibig sabihin ng paghahandog ng kamangyan ay mga panalangin ng mga banal.

Revelation 5:8 At pagkakuha niya ng aklat, ang apat na nilalang na buhay at ang dalawangpu’t apat na matatanda ay nangagpatirapa sa harapan ng Cordero, na ang bawa’t isa’y may alpa, at mga mangkok na ginto na puno ng kamangyan, na siyang mga panalangin ng mga banal.

Hindi ba ito isang napakagandang balita sa mga Pinoy?